27.03.2024

2024 yilning 25-26 mart kunlari Toshkent shahrida “O‘rta Osiyoda nemis tilini o‘qitishning dolzarb masalalari” mavzusida O‘rta Osiyo nemis tili o‘qituvchilarining xalqaro 2-forumi bo‘lib o‘tdi. Forum ishida O‘rta Osiyoning barcha mamlakatlari: Qozog‘iston, Qirg‘iston, Tojikiston, Turkmanistondan nemis tili o‘qituvchilari, shuningdek Germaniya va Avstriya kabi nemiszabon mamlakatlaridan ekspert mutaxassislar tashrif buyurdilar. Tadbir Germaniyaning O‘zbekistondagi Gyote instituti, DAAD jamg‘armasi, O‘zbekiston nemis tili o‘qituvchilari assosiatsiyasi, O‘zDJTU va “O‘zbekiston – Germaniya” do‘stlik jamiyati hamkorligida bo‘lib o‘tdi. 

         Ma’lumki, O‘zbekistonda nemis tili ingliz tilidan keyin eng ko‘p o‘qitiladigan chet tili hisoblanadi. Aksariyat viloyatlarda nemis filologiyasi  kafedralari mavjud, barcha OTM, ko‘plab lisey va kolledjlar, hamda umumta’lim maktablarda nemis tili birinchi yoki ikkinchi chet tili sifatida o‘qitilib kelinmoqda. 

Nemis tili o‘qituvchilari, ayniqsa O‘zDJTU professor – o‘qituvchilari va talabalari “O‘zbekiston – Germaniya” do‘stlik jamiyatining ko‘pchilik tadbirlarida hamkorlik qilib kelmoqda. Xususan, shu kunlarda jamiyat tashabbusi bilan O‘zbekistonning Revotech IT- firmasi bilan O‘zDJTU talabalari logistik loyiha doirasida hamkorlik qilmoqda. “O‘zbekiston – Germaniya” do‘stlik jamiyati O‘zDJTU qoshida bo‘lib o‘tgan ushbu xalqaro forumni jamiyat jamg‘armasida mavjud adabiyotlar bilan ta’minlashda va O‘rta Osiyo mamlakatlari delegatsiyalariga esdalik sovg‘alari xarid qilish va tantanali topshirishda qatnashdilar. “O‘zbekiston – Germaniya” do‘stlik jamiyati ijrochi direktori Yu.Ismailov forumning ochilishi so‘z oldi va jamiyat faoliyati haqida forum qatnashchilariga axborot berdi.